Íslenskir jarðvangar miðluðu þekkingu á evrópskri jarðvangaráðstefnu í Finnlandi

Fulltrúar íslenskra UNESCO-jarðvanga tóku virkan þátt í ráðstefnu European Geoparks Network (EGN) í Finnlandi í september. Þar kynntu þeir fjölbreytt verkefni á sviði menntunar, jarðminja, sjálfbærrar og nærandi ferðaþjónustu, samfélagsþátttöku og seiglu byggðarlaga.

Fulltrúar Reykjanes UNESCO Global Geopark og Kötlu UNESCO Global Geopark, ásamt fulltrúa GeoCamp Iceland, tóku þátt í ráðstefnu European Geoparks Network (EGN) sem haldin var í Saimaa í Finnlandi dagana 16.–18. september 2026.

Ráðstefnan er mikilvægur samstarfs- og þekkingarvettvangur evrópskra UNESCO-jarðvanga. Þar koma saman sérfræðingar, stjórnendur og samstarfsaðilar jarðvanga til að miðla reynslu, kynna ný verkefni og ræða hvernig jarðvangar geta stuðlað að sjálfbærri þróun, verndun jarðminja, fræðslu og samfélagslegri uppbyggingu.

Fjölbreytt verkefni íslenskra jarðvanga

Íslensku þátttakendurnir kynntu fjölbreytt verkefni sem endurspegla víðtækt hlutverk jarðvanga og mikilvægi samstarfs við skóla, fyrirtæki, sveitarfélög og nærsamfélög.

Frá Reykjanes jarðvangi voru kynnt verkefni sem tengjast uppbyggingu skólanets, útinámi og samstarfi um menntun til sjálfbærni. Einnig var fjallað um hvernig almyrkvi á sólu í ágúst 2026 varð vettvangur fyrir fræðslu, samstarf og virka þátttöku samfélagsins.

Þá voru kynnt alþjóðleg samstarfsverkefni á sviði nærandi ferðaþjónustu, REGENERATE og Green Footprint, auk erindis um seiglu samfélags og atvinnulífs í Grindavík og hvernig samstarf ólíkra aðila getur stutt við uppbyggingu í kjölfar náttúruhamfara.

Katla jarðvangur kynnti verkefnið Eyjafjallajökull Geological Path, jarðfræðileið við Eyjafjallajökul, þar sem jarðfræðileg sérstaða svæðisins er nýtt til fræðslu og miðlunar.

Arnbjörn Ólafsson frá GeoCamp Iceland fjallaði um hvernig vettvangsstaðir og jarðfræðileg sérstaða svæða geta nýst í starfsþróun og faglegu námi.

Samstarf og þekkingarmiðlun milli jarðvanga

Auk erinda á ráðstefnunni stýrði Sigrún Svafa Ólafsdóttir frá Reykjanes jarðvangi vinnustofunni Ripples of Knowledge, þar sem áhersla var lögð á útinám, miðlun þekkingar og þróun samstarfs milli UNESCO-jarðvanga.

Þátttaka í slíkum vinnustofum og faglegum samtölum skapar tækifæri til að þróa sameiginleg verkefni, miðla reynslu og nýta þekkingu annarra jarðvanga í áframhaldandi starfi hér á landi.

Mikilvægi alþjóðlegs samstarfs

Íslandsdeild jarðvanga leggur áherslu á mikilvægi virkrar þátttöku íslenskra jarðvanga í alþjóðlegu samstarfi. UNESCO-jarðvangar eru ekki eingöngu vettvangur fyrir verndun og miðlun jarðminja heldur gegna þeir einnig mikilvægu hlutverki í menntun, sjálfbærri byggðaþróun, ferðaþjónustu og eflingu nærsamfélaga.

Þátttaka íslensku fulltrúanna í EGN-ráðstefnunni sýnir vel hvernig verkefni sem þróuð eru innan íslenskra jarðvanga geta nýst sem dæmi og innblástur fyrir aðra jarðvanga, um leið og alþjóðlegt samstarf skilar nýrri þekkingu og hugmyndum til Íslands.

***

Erindi og vinnustofur íslensku þátttakendanna:

Reykjanes UNESCO Global Geopark

Sigrún Svafa Ólafsdóttir

• Building a UNESCO School Network Through a UNESCO Global Geopark: A Regional Model for Sustainability and Global Citizenship Education

• Vinnustofa: Ripples of Knowledge: Creating Outdoor Learning Community and Database through UNESCO Global Geoparks

Þuríður H. Aradóttir Braun

• From Eclipse to Community: How Reykjanes UNESCO Global Geopark Mobilised Education, Tourism and Local Stakeholders Around the 2026 Total Solar Eclipse

• REGENERATE: Advancing Regenerative Tourism Through Cooperation Between UNESCO Global Geoparks and Northern Peripheral Regions

• Green Footprint: Preparing the Next Generation of Regenerative Travellers Through UNESCO Global Geoparks

• From Crisis to Collective Action: Building Community and Business Resilience in Grindavík, Reykjanes UNESCO Global Geopark

  
  

Katla UNESCO Global Geopark

Sigurður Sigursveinsson

• Eyjafjallajökull Geological Path

  
  

GeoCamp Iceland

Arnbjörn Ólafsson

• From Field Sites to Professional Learning